Kutxabank geurea delako!
Urriaren 24an Kutxa aurrezki erakundeak fundazio bankario bihurtzeko batzarra deitu du. Europako eta Espainiako legeek derrigortzen duten aitzakiarekin estatu golpe bat ematera doaz berriro ere, eta azken 30 urteotan Kutxako gobernu ordezkariak sindikatu, bezero, instituzio publiko eta eragile sozialek aukeratzen bazituzten ere, aurrerantzean alderdi eta sindikaturen baten 15 patronoren esku geratuko da. Hau onartezina da, gainera kontutan eduki behar dugu, hauen azken helburua Kutxabanken akzionista pribatuei ateak irekitzea dela.
Operazio honi gehitu behar diogu orain dela hilabete batzuk Vital eta BBK 15 patronoren esku utzi zuten bi kutxa horietako patrimonio eta gestio osoa, eta orain haien menpean ez dago inongo kontrolik, ez publiko ez soziala. Eta haiek erabakiko dute haien etorkizuneko ordezkoak, akzioen salmenta eta gizarte ekintzaren etorkizuna.
Hainbat alderdi eta Kutxabankeko zuzendaritza bere postuetan betirako jarraitu nahi dute eta nahiz eta maiatzeko hauteskundeetan aldaketa handiak egon, jarrera antidemokratiko horrekin ez dute aldatu nahi izango, orain arteko kontrol guztia ekiditea lortuz. Bere helburuak, bere postuetan geratzeaz gain, beraien boterea handitzea da, euskal ekonomia bultzatu gabe eta gizartean pobrezia handitzen jarraitzeko: IRPH aplikatuz, fondo putreei bezeroen zorrak oparituz, Euskadiko hainbat enpresa estrategikoen akzioak salduz, etxetik kaleratzeak eginez, komisioak handituz, eta etorkizunean akzionista pribatuak sartuz, irabazi horiek beste batzuen eskuan uzteko.
Honen aurrean hainbat alternatiba daude, adibidez Gipuzkoako Foru Aldundiak akzioak lagatzearena. Proposamen legala da, eta aurrera eman daiteke. Baina horretarako beharrezkoa da alderdien aldetik borondate politiko irmo bat. Alternatiba honekin kontrol publiko eta soziala ez zen desagertuko, guztiz kontrakoa, handitzeko aukerak ditugu.
Kutxa fundazio bihurtzen denean, hurrengo pausoa akzioak saltzea izango da etorkizun hurbilean. Derrigortuko digutela “argudiatuko” dute berriro ere, eta euskal Aldundiak akzio hauek erosteko eskainiko dira (jakinda hori ezinezkoa dela, ez bait dutelako diru nahikorik akzio guztiak erosteko). Orain arte denok kontrolatzen genuena, berriz ordaindu behar dugula eskainiko digute, a ze paradoxa! Honen aurrean galdera garbia da: Zer erabakiko dute fundazio berriko ordezkariek, kontrol publiko eta soziala bermatzen duten instituzio publikoei Kutxabanken akzioak lagatzea ala interes pribatuak defendatuko dituzten akziodun pribatuei akzioak saltzea?
Erantzuna zure esku dago, herriak bere ordezkariei exijitzen badie kontrol publiko eta soziala bermatzea, hauek lagatzearen aukera bultzatu dezakete. Horretarako nahitaezkoa da hitzetik ekintzetara igarotzea. Horretarako hainbat elkarte eta sindikatu antolatu ditugun ekintzetara gonbidatzen zaituztegu: 23an herriz herri kartelak eta eskuorriak banatuko dira, herritarrak ondo informatzeko eta 24an, 10:30etan akanpada eta 15:00ean kazerolada egingo da Kutxaren egoitzaren aurrean.