Martin Garitanok pertsonalki azaldu dio Xabier Iturbe Kutxako lehendakariari erakunde horrek publikoa izaten jarrai dezan Gipuzkoako Foru Aldundiak egin duen proposamena. Bilera egin dute biek gaur goizean, eta ahaldun nagusiak planteamenduaren nondik norakoak helarazi dizkio.
Bilera hasi aurretik Garitanok esan duenez, Aldundiaren proposamena Kutxaren Batzarrera eramateko eskatuko dio Iturberi. Proposamenak berme juridiko guztiak dituela, legezkoa dela eta, beraz, «guztiz egingarria» dela nabarmendu du.
Ahaldun nagusiak joan den astean igorri zion eskutitza Iturberi, proposamenaren berri emanez eta bilera bat eskatuz. Kutxak Kutxabanken dituen akzioak udalen eta Foru Aldundiaren esku uztea proposatu du Diputazioak, doako eskualdatze baten bidez. Kutxak ere akzio kopuru jakin bat izango luke eta Gizarte Ekintza kudeatzeaz arduratuko litzateke fundazio arrunt gisa, banku fundazio bihurtu beharrik gabe.