NAIZ
DONOSTIA

Loiolakoa «epaiketekin bukatzeko bidean urrats berria» izan dela diote Aske Gunearen bultzatzaileek

Loiolako Aske Gunearen bultzatzaileek zoriondu egin dituzte herri harresian modu batera edo bestera parte hartu duten guztiei eta «salbuespen politikekin eta epaiketekin bukatzeko bide luzean urrats berria» egin dutela nabarmendu dute.

Loiolako Aske Gunearen irudia, atzo arratsean hartutakoa. (Idoia ZABALETA/ARGAZKI PRESS)
Loiolako Aske Gunearen irudia, atzo arratsean hartutakoa. (Idoia ZABALETA/ARGAZKI PRESS)

Aske Gunearen bultzatzaileek Loiolan egunotan jazotakoaren balorazioa egin dute, Ertzaintzak herri harresia deuseztu eta biharamunean.

Modu batera edo bestera Aske Gunean parte hartu duten guztiak zoriondu egin dituzte, eta Ertzaintzak atxilotu zituen Jazint Ramirez, Irati Tobar, Igarki Robles, Xabier Arina eta Imanol Salinasi elkartasuna eta babesa adierazi diete.

Loiolan gertatutakoa «latza» izan dela nabarmendu dute eta ez dute errepikatzerik nahi. «Ez dugu lagun gehiagoren atxiloketa eta espetxeratzerik bizi nahi, ez dugu eskubideak praktikatzeagatik auziperatutako euskal herritarrik nahi», adierazi dute, baina, aldi berean, «motiborik ematen jarraitzen badute» berriro egingo dutela ohartarazi dute.

Aske Guneko bultzatzaileen arabera, atzokoa «salbuespen politikekin eta epaiketekin bukatzeko bide luzean urrats berria» izan zen, «ekimen zehatz honi begira Aske Guneko lagunek eta auziperatuek geure buruei jarritako helburuak lortu ditugulako».

Igandetik astelehenera Loiolan bizitakoa «hasi berri den epaiketa honen eta beste guztien aurka borrokatzeko erregai» izango dela sinistuta daude, oharrean diotenez.