NAIZ
BAIONA

Ipar Euskal Herriak Macron legea izan du gogoan Maiatzaren Lehenean

Baionan bildu dira sindikatu eta eragile sozialak Ipar Euskal Herrian. Bertan, murrizketen aurka eta langileen eskubideen borrokan «ekintza kolektiboa ezinbestekoa» dela aldarrikatu dute.

LAB Baionako kaleetan. (KAZETA)
LAB Baionako kaleetan. (KAZETA)

Ehunka pertsona elkartu dira Baionan euriaren gainetik Maiatzaren Leheneko mobilizazioetan. 10:30ean ekin diote manifestaldiari, sindikatu eta eragile sozial desberdinek. CGT buruan zela, ‘Austeritateari ez, enplegu, soldata, zerbitzu publiko eta babes sozialarengatik’ lemapean.

«Sindikalismoa kriminalizatzen duen patronalaren aurrean, ekintza kolektiboa ezinbestekoa da demokrazian», adierazi du Marie-Pierre Clearboutek, bertako idazkari nagusi moduan. Macron legea ekarri du gogora eta honek langileriaren eskubideetan suposatzen dituen urraketak.

CGTrekin batera, hainbat sindikatu eta erakunde bildu dira. Hauen artean LAB, zeintzuek langileriaren «segurtasun eza» salatu duten. Era berean, «espazio sozio-ekonomiko iraunkor bat sortzea eta kolektiboak Euskal Herrian espazio bat izatea» aldarrikatu dute. Borroka honetan, «boterearen oreka handiagoa» ezinbestekoa dela azpimarratu dute.

Bizi! elkartea ere izan da bertan. ‘Ez etsi, trantsizioa dago!’, aldarrikatu dute.