Gaur mobilizazio eguna da hainbat hezkuntza eragilerentzat. Lomceri ezetz errateaz gain, eraikuntzarako saltoa eginen dute. Kalejiren bidez irudikatuko dute jauzia Gasteiz, Donostia eta Biilbon. 17.00etan aterako dira Zabalburu plazatik, Bulebarretik eta Foru plazatik. Iruñean, aldiz, asanblada irekia eta elkarretaratzea eginen dituzte. 10.00etan da hitzordua, Biurdanan.

Herriz herri, ikastetxez ikastetxe hezkuntza komunitateak Lomceri eta «hau aplikatzen duen Heziberriri» aurre egiteko neurriak eta konpromisoak hartu dituztela azaldu zuen atzo Topaguneak, Donostiako Aitor ikastolan egindako agerraldian. «Behin eta berriz eskertuko eta zorionduko ditugu iaz 3. mailako ebaluazioari aurre egiteko ausardia erakutsi zuten familia eta ikastetxe guztiak», nabarmendu zuten.

Hiru puntuk batzen dituzte mobilizazioetako parte-hartzaile guztiak: Lomceri aurre egiteko konpromisoak, inposaketen kontra egoteak eta hezkuntza sistema propiorantz pausoak eman nahi izateak. Hainbat eragile bilduko dira: Kontseilua, Ikastolen Elkartea, Sortzen, Ikasle Abertzaleak, Bilgune Feminista, LAB, ELA, Steilas, ESK, Hik Hasi, Urtxintxa eta Amarauna Astialdi Elkarteen Sarea.