Elurra eta euri jasa etengabeak arazo ugari eragiten ari dira euskal errepide sarean.

Elurraren eraginez, zenbait mendate itxi dituzte: Opakua, Urduña, Herrera eta Belagua. Azken horretan, NA-137 errepidean, elur-jausi bat izan da 52. kilometroan eta errepideko 20 metro hartu ditu, metro bateko lodierarekin. Ez da zauriturik izan baina bidea moztuta geratu da 47. kilometrotik, Juan Pito bentatik, garbiketa lanak egiteko.

Horrez gain, Nafarroan ere bigarren mailako errepideren bat dago moztuta, adibidez, Lizarra eta Olatzagutia batzen dituena.

Bestalde, Zaldiaran kamioientzako itxita dago, eta kateak derrigorrezkoak dira, Lizarraga, Azazeta eta Gatzagan.

Elurrak atzo gauean zuritu zituen jada Iruñerriko puntu zenbait, eta gaur ere era horretan esnatu dira beste batzuk.