Naiz.info
Donostia

Joseba Erostegi euskal presoari ebakuntza egin diote

Berrogeita hamar polipo baino gehiago aurkitu dizkiote preso antzuolarrari eta kolon guztia kendu behar izan diote. Senideek 15 minutuz bakarrik ikus dezakete egunean.

Antzuolako Joseba Erostegi euskal presoari ebakuntza egin zioten pasa den astelehenean Ciudad Realeko erietxean, Etxerat elkarteak jakitera eman duenez. Iragan otsailean fistula batekin arazoak izan zituen eta orduan eginiko kolonoskopiaren emaitza aztertu ostean, antzuolarrari ebakuntza egitea erabaki zuten medikuek.

Ordu hartan egindako frogak 50 polipo baino gehiago zituela azaleratu zuen eta, polipo horiek minbizi bihurtzeko arriskua zela-eta, ebakuntza egitea erabaki zuten. Kolon osoa kendu behar izan diote.

Familiaren arabera, ebakuntza ondo atera da eta Erostegi egoera onean dago, baina presoa osatzeko bidean datorren bi asteak «oso garrantzitsuak» izango direla adierazi dute.

Erostegik Ciudad Realeko erietxean jarraitzen du ospitaleratuta, Euskal Herritik 600 kilometrotara. Senideek egunean soilik 15 minutuz ikus dezaketela salatu dute.