NAIZ

Giza eskubiden defentsa alderdien lehiatik kanpo jartzeko deia egin du Etxeratek

Loiun izandako autobusen aurkako erasoak konponbideari ez diola inolako ekarpenik egiten uste du Etxeratek, baina kezka agertu du alderdi batzuen erantzunean, «bestelako egoerak eman direnean, azken orduetan ikusi dugun irmotasuna eta arreta behatu ez izanak kezkatzen gaitu». Konponbideak alderdi politikoen heldutasuna eskatzen duela aldarrikatu dute.

«Gaur ostirala da eta, berriz ere, errepidean jartzea tokatzen zaigu. Noiz arte?». Etxeratek Loiuko autobusen aurkako erasoaren inguruan igorri duen oharraren amaieran egiten duen galdera da. Lakuako Gobernuari erantzunez hedatu du oharra presoen senideen elkarteak. Izan ere, Urkulluren gobernuak gaitzespena eskatu zien presoen eskubideen defentsan ari diren eragileei.

Etxeratek salaketa bikoitza egin du bere oharrean: gertakariarena berarena, konponbideari ez diolako inolako ekarpenik egiten, euren ustez, eta alderdi batzuen erantzunarena, konponbideak alderdien arteko lehiatik kanpo egon behar duela uste dutelako.

Loiuko gertakariaz esan du «kezka handia» eragiten diela gertakariak, ez duelako ekarpenik egiten eta «aspaldi lanean gabiltzan koponbideari» ez diolako laguntzen. Egungo egoerak «erabaki politiko ausarten» beharra duela uste du Etxeratek. Horregatik kezka agertu du «bestelako egoerak ematen direnean, azken orduetan ikusi dugun irmotasuna eta arreta» ez dutelako ikusten.

Desio bat ere plazaratu du, ordezkari politikoen «jarrera aldaketan eta heldutasun politikoan» sinesten dutela adierazi dute.