NAIZ

Eh Bilduk amaiera arte eramango du Otegiren hautagai izendapenaren erabakia

Gipuzkoako Hauteskunde Batzordeak gaur jakinarazi dio EH Bilduri Arnaldo Otegi «ezgaitua» dagoela hautagaia izateko. Erabakia «oinarri juridikorik gabekoa» dela uste du EH Bilduk, eta «gehiago duela oinarri politikoa» salatu dute.

EH Bilduk Gipuzkoako Hauteskunde Batzordearen azken erabakia salatu du, Arnaldo Otegi lehendakarigai izateko «ezgaitua» dagoela «oinarri politikoko erabakia» dela salatuz. «Ez da sartu auziaren mami juridikoan, eta Audientzia Nazionaleko Fiskaltzak aurkeztutako idazkaia aintzat hartzera mugatu da», gehitu du koalizioak ohar baten bidez.

Hurrengo egunetan errekurtsoa jarriko du EH Bilduk. «Arnaldo Otegik EH Bilduren lehendakarigaia izaten jarraitzen du eta auzi-bidea amaieraraino jarraitzeko bere konpromisoa berresten dugu», adierazi dute.

Hauteskunde Batzordeak hartutako erabakia «demokraziari egindako beste eraso bat» bezala ulertzen du EH Bilduk. «XXI. mendean ez da ulergarria herritar bati bere eskubide sozial eta politikoak murriztea, arrazoi eta argudio politikoengatik». Espainiar Estatuari «Arnaldo Otegik eta EH Bilduk ordezkatzen duten proiektu politikoa indargabetzeko asmoa» izatea leporatu diote. «Herri akordio zabal eta garrantzitsuei beldurra diote».