Bilbon eginiko bileran, EH Bilduko eledunek agiri bat helarazi diote ordezkaritza jeltzaleari, zeinetan koalizioak erantzuna eman dion irailaren 25eko hauteskundeak egin eta astebete geroago egin zuten aurreneko bileran EAJren hamar ardatzak aurkezteko eman zitzaien proposamenari.
Ekarpen horri «albait arinen» erantzungo diola hitzeman du EAJk.
Etorkizun berria eraikiko bada, bake eta bizikidetzan zein autogobernuan aurrera egitea «funtsezkoa» dela ulertu dute bi taldeek. Ildo horretan, bi aldeek esparru horietan adostasunak bilatzen jarraitzeko borondatea agertu dute eta irekitako elkarrizketa bideari eutsiko diote.
Beste alde batetik, gizarte politiken arloan «ezberdintasun handiak» dituztela nabarmendu dute.
Dena dela, «egoki dute elkarrizketarako eta irizpideak partekatzeko ateak irekita mantentzea».
Alderdi jeltzalearen izenean, Joseba Egibar, Koldo Mediavilla, Josu Erkoreka eta Txus Peña izan dira bileran eta, EH Bilduren ordezkaritza, aldiz, Arnaldo Otegik, Maddalen Iriartek, Unai Urruzunok eta Garikoitz Mujikak osatu dute.