Emakundek adierazi duenez, jaietan izaten diren eraso sexistak prebenitzea «guztion kezka da, herritarrena eta erakundeena, bereziki tokiko eremuko erakundeentzat, jaietako espazioetatik gertuen daudelako».

Horregatik, eta jai guneetan eta egunetan ere errespetuan, berdintasunean eta autonomian oinarritutako jarduerak bultzatzeko asmoz, Beldur Barik programaren barruan materiala bidali zaie Araba, Bizkaia eta Gipuzkoako udalei haren bidez herritarrak gai horrekin sentikortzeko eta inplikatzeko.

Zehazki, material horren barruan daude kartel bat, udalaren logoarekin pertsonalizatu daitekeena; jai guneetan banatzeko pegatina mota bat eta beste bat ostalaritzako lokaletan, komertzioetan eta txosnetan erabiltzeko. Material guztia Emakunderen webgunean lor daiteke.

Beldur Barik Gunea

Emakunderen arabera, udalei proposatutako kanpaina hau «urrats txiki bat da, Beldur Barik Gunea ekimenaren barruan udaletan egindako esperientzia arrakastatsuetarako bide bihurtu daitekeena». Izan ere, Beldur Barik Gunean lan prozesuak betetzen dira gazteekin, jai eta aisialdi giroetan izaten den indarkeria sexuala antzemateko, prebenitzeko eta aurre egiteko banakako zain taldeko erantzunak garatzeko. Dagoeneko zenbait udalerrik urte osoan zehar lan egiten dute Beldur Barik Gunean, eta iaz 39 udalerrik parte hartu zuten.

Kanpaina bultzatzaileen iritziz, «jaietan ere islatu behar da berdintasunezko gizartearen aldeko lana, pertsona guztien eskubideak errespetatzen dituen gizartearen aldekoa». «Ez alkohola, ez jaia bera, ez dira aitzaki emakumezkoen eta gizonezkoen eta neska eta mutilen arteko harremanak berdintasunezkoak ez izateko, emakumeak sexu objektu gisa tratatzeko, edo zenbait tokitan segurtasun eza edo beldurra sentitzeko», adierazi dute.

Hortaz, erakundeok «jarrera aktiboa» eskatu dute emakumeak errespetatzen ez dituzten edozein adierazpen fisikoren edo hitzezkoren kontra, «errespetuan, berdintasunean eta autonomian oinarritutako jarrera».