Che Guevarari gorazarre egiten dion herrian, Santa Claran, El Mejunje izeneko gune kultural autogestionatu bat aurkitzen da. Herri bat, gaztetxe bat. Etxean bezala sentiarazi gaituzte.

San Antonio de los Baños, Kubako Zine Eskola ospetsua dagoen herrian antolaturiko rock festibalean parte hartu dugu. Anfiteatro batean aritu gara, anplifikadore barik. Gabonak Karibean oso ezberdinak dira.

«Gu gara garen modukoak, ez gara aldatuko». Horrela abesten dugu kanta batean eta horrela egin genuen Habanako metal zaleen aurrean. Punkyak ere baziren eta gurekin batera igo ziren eszenatokira. ‘Dale Candela!’ martxan da.

Salsa, son, merengue... topiko musikaletatik haratago, erritmo dantzagarriak baino askoz gehiago aurkitu daitezke Kuban. Azaleko begirada batean ikusten ez bada ere, metal, punk eta rock taldeak gero eta indar gehiago hartzen ari dira irlan.