GARA
BARTZELONA

Zinemaldia.Cat jaialdiak hiru euskal pelikula saritu ditu

Bartzelonako Euskal Etxeak antolatutako Zinemaldia.Cat jaialdiak hiru euskal film saritu ditu. Patxo Telleriaren “Igelak” filmak fikziozko lanik onenaren Urrezko Txapela jaso du, dokumental sailean Estibaliz Urresolaren “Paris. Paperezko ahotsak” izan da garailea, eta Jon Maiaren “Gutik zura” lanak jaso du euskarazko lanik onenaren Azkue Fundazioa Urrezko Txapela.

Sariak joan den igandean banatu ziren Cinemes Girona aretoetan. Jaialdia dagoeneko Catalunya Film Festivals ekimenaren barruan dago eta helburuetako bat «topikoak haustea da, esaterako, Euskal Herrian egindako zinema ez dela soilik euskaldunei buruzkoa eta euskaldunei zuzendua».