Sanferminetako tonu zuri-gorriak atzean geratu dira dagoeneko, baina Iruñeko Gaztelu plazak eta kioskoaren inguru osoak kolore bizi-biziak berreskuratu zituzten atzo, momentu (edo «momentico» esan beharko genuke oraindik?) batez izan bazen ere. Ortzadarra alderik alde, kioskoaren gainean koloretako txapela marraztuz. Eta argazkilariak, jakina, azkar asko egin zuen «klisk», uneak ihes egin ez ziezaion. Atzoko (goizeko, batik bat) eguraldi nahasiak –orain laino potolo eta euri zaparradak, geroxeago oskarbi eta eguzki izpiak– han-hemenka utzi zituen horrelako irudiak. Eder askoak.

Argazkia: Karlos TERES