«Historia markatuko duen egun bat» izango da azaroaren 2a Ipar Euskal Herrirako ‘Gazte Dinamika Berria’ lelopean garatu duten prozesuko kideen arabera. Antolakunde berri bat aurkeztuko dute Baionan, «Ipar Euskal Herriko gazte ezkertiar eta abertzaleak ordezkatuko dituen antolakuntza».

Otsailean abiatu zuten ‘Orain dun/k tenorea’ leloari helduta prozesua, Ezpeletan antolatu zuten gazte egunarekin. «Arrakastatsua» izan zen lehen kolpe hura gazteen iritziz eta hurrengo zortzi hilabeteetan gogoeta eta eztabaida prozesu sakona eraman dutela adierazi dute gaurko Baionako agerraldian. 120 gazte inguruk parte hartu dute prozesu horretan eta oso pozik agertu dira bultzatzaileak izandako harreragatik.

Ondorio nagusi bat atera dutela adierazi dute, antolatzeko beharra «egunerokotasunean ditugun arazoei modu eraginkorrago batean erantzuteko eta konponbideak lortzeko». Antolakunde berria «gizartean eta oro har sistema honetan» gazteen ahotsa «entzuna eta errespetatua izan dadin» sortuko den erabile politiko eta soziala izango dela aurreratu dute.

‘Jeiki Gazte!’, egun osoko egitaraua

Abiapuntua indartsua izatea nahi dute eta egun osoko egitaraua antolatu dute horretarako Baiona ttipian. Eztabaida batek abiatuko du eguna, nazioarteko hainbat ordezkariren parte hartzearekin krisi ekonomikoa izango dute hizpide. Kortsika, Bretainia, Flandria, Alemania, Italia, Katalunia, Venezuela, Palestina eta Kurdistango ordezkariak izango direla iragarri dute.

Txaranga giroan bazkaria izango da gero eta animazioak eta gazteen arteko harremana sakontzeko jokoak izango dira. Iluntzean gazte antolakunde berriaren sorrera ekitaldia izango da eta eguna bukatzeko kontzertuak iragarri dituzte: 2ZIO, Berri Txarrak, DJ Pone eta talde sorpresa bat izango dira.