NAIZ
BAIONA

Ipar Euskal Herriko etapan euskara aintzat hartuko duela agindu du Tourreko zuzendariak

Uztailaren 28an Senpere eta Ezpeleta bitartean jokatuko den etapan seinale elebidunak jarriko dituztela eta hizlari ofizialek ere mezuak euskaraz eta frantsesez emango dituztela agindu du Christian Prudhomme Tourreko zuzendariak, Euskaltzaindiaren eskaerari erantzunez.

Senpere eta Ezpeleta bitartean jokatuko den erlojuaren kontrako etaparen profila.
Senpere eta Ezpeleta bitartean jokatuko den erlojuaren kontrako etaparen profila.

Euskaltzaindiak jakinarazi duenez, uztailaren 28an Ipar Euskal Herritik igaroko den Tourreko erlojupeko etapan euskaraz aintzat hartuko dutela agindu du lasterketaren zuzendaritzak.

Vueltako antolatzaileekin egin zuen bezalaxe, Christian Prudhomme Tourreko zuzendariari euskal herritarren hitzkuntza eskubideak errespetatzeko eskaera egin zuen Euskaltzaindiak, bi lasterketak Euskal Herritik igaroko direla kontuan harturik.

Eskari horri erantzunez, uztailaren 28an Senpere eta Ezpeleta bitartean jokatuko den etapan seinale elebidunak jarriko dituztela agindu du Frantziako Itzuliko zuzendariak, Ipar Euskal Herriko erakundeekin eta bi udalerriotako hautetsiekin adostu duten legez. Horrez gain, lasterketako hizlari ofizialek mezuak ere frantsesez bezala euskaraz ere emango dituztela esan dute.

Erantzun honen balorazio baikorra egin du Euskaltzaindiak, garrantzitsua iruditzen baitzaio «Tourreko Ipar Euskal Herriko etaparen garapenean zein haren sustapenerako egiten diren askotariko ekimenetan toki duina eta aproposa ematea. Urtarrilean igorritako gutunean, presentzia hori, gutxienez, gainerako hizkuntzen parekoa izan behar duela gogorarazi zion Euskaltzaindiak Tourreko zuzendariari.