Kristoff, garaile Parisen Thomasek irabazitako Tourrean

Geraint Thomasek bere ibilbideko lehenengo Tourra irabazi du. Parisko etapa, aldiz, Kristoff norvegiarrarentzat izan da. Sky-ko txirrindulariek irabazi dituzte azken zazpi edizioetatik sei. [Emaitzak eta sailkapenak]

NAIZ|PARIS|29/07/2018 19:25
Tourra
Kristoff, nagusi Parisen. (Jeff PACHOUD/AFP)

Iritsi da Tourra Parisera; iragan dira 21 egun txirrindulariek lehen pedalkadak eman zituztenetik. Esprinterren ohiko agertoki da hiriburu frantziarra, eta pronostikoek es dute hutsik egin aurtengo edizioan ere.

Hala, Kristoff norvegiarra nagusitu da Parisko helmugan, Degenkolb eta Demareren aurretik. Izan da erasorik azken kilometroetan, baina pelotoiak motzean lotu ditu ausart jokatu duten txirrindulariak –Politt, Oss eta Lampaert–, esprinta ziurtatuz. Sagan, maillot berdearen jabea, zortzigarren izan da igande honetako etapan.

Sailkapen nagusiari dagokionez, Geraint Thomas galestarra gailendu da. Poltsikoratzen duen lehenengo Tourra du Thomasek, baina zazpi urtean seigarrena du Sky talde britainiarrak. Gainera, bigarren txirrindulari bat ere sartu dute podiumean: Chriss Froome hirugarren postuan. Tartean, Tom Dumoulin herbeheretarra sartu zaie Sky-ko txirrindulariei.

Mikel Landa izan da sailkapen nagusiko lehen euskalduna. Zazpigarren postuan sailkatu da murgiarra, baina ez da kontent izango egindako lanarekin. Sailkapenean atzerago amaitu izanagatik ere, gertuago izan dute etapa garaipena Ion eta Gorka Izagirre eta Mikel Nievek; guztiek amaitu dute etaparen bat bigarren postuan.

Gainerako sailkapenei dagokienez, Julian Alaphilipperentzat izan da mendiko maillota; gazteena, berriz, Latour frantziarrak irabazi du.

Errepasatu Tourrak utzi dituen emaitza eta sailkapen guztiak NAIZen webgune berezian.

RELATED NEWS