NAIZ
Orio

Zuzeneko diskoa kaleratuko du udazkenean Olatz Zugastik

Bere lehen zuzeneko diskoa izango da eta Orion eskainitako kontzertu baten grabaketa izango da oinarri, non aurreneko diskotik hasi eta azken lanetara doazen kantuen errepasoa egiten duen.

Olatz Zugasti. (Isabelle MIQUELESTORENA / FOKU)
Olatz Zugasti. (Isabelle MIQUELESTORENA / FOKU)

Olatz Zugastik zuzeneko diskoa kaleratuko du udazkenean. 2015ean bere azken lana ‘Ur goiena ur barrena’ kaleratu ondoren eman zuen saltoa taula gainera, 38 urtez Benito Lertxundirekin lanean aritu ondoren bere lan pertsonala kontzertuetan aurkezteko asmoz.

Orain, kontzertuetan murgilduta, bere lehen zuzeneko diskoa argitaratuko du. Orion eskainiatko kontzertu baten grabaketa bat izango da, non bere lehen diskotik hasi eta azken lanera arte sortu dituen kantuak entzungo diren, baita hainbat euskal kantu tradizional eta Benito Lertxundiren bat ere, bere alaba Gratxinak abestua.

Kantu horien moldaketan Olatz Zugastik harpa, bere ohiko instrumentua, eta gitarra erabiltzeaz gain, hainbat musikari izan ditu lagun: Ander Ederra gitarra elektriko eta akustikoarekin, Ander Zulaika baterian eta Gratxina Lertxundi teklatuan, flautan eta koroak egiten.