Parisko Kasazio Gorteak Iratxe Sorzabalen defentsak ezarritako helegitea errefusatu du

Sententzia kaleratu aitzin Efe agentziak aditzera eman duenez, Parisko Kasazio Gorteak ezezkoa eman dio Iratxe Sorzabalaen defentsak ezarritako helegiteari. Euroagindua betetzeko beharraren gainean, Europako Batasuneko Lege Auzitegiari «arazo prejudiziala» aurkeztea eskatu zion defentsak Kasazio Gorteari.

Haritz Larrañaga|19/11/2019
Sorzabal
2018eko ekainaren 2an Sorzabalen auro-aginduen kontra Irunen egin zen manifestazioa. Jon URBE / FOKU

«Dezepzioa» eta «Europa mailan Frantziako justiziak huts egite handia egin» duela azaldu du Xantiana Cachenaut abokatuak NAIZi egin adierazpenetan. Frantziako justiziak Sorzabalen aurka Madrilek aurkezturiko euroaginduak ontzat eman ondoren Kasazio Gortearen aurrean helegitea ezarri zuen preso irundarrak eta gaur helegitea ukatu diote.

Euroaginduaren auzia Sorzabalek salatu zituen torturapean eginiko adierazpenetan oinarrituta dagoenez, Reauko espetxean zigorra betetzen duen presoaren defentsak eskaera egin zion Kasazio Gorteari, Luxenburgoko Auzitegiaren aitzinean «arazo prejudiziala» aurkez zezan, baina Kasazio Gorteak hartu duen erabakiaren ostean, bide hori moztuta geratu da.

Honakoa eskatu zioten abokatuek auzitegiari: giza eskubideen bortxaketari buruz zalantza edo arrisku handia izanik frantses justiziak derrigorrez eroagindua gauzatu behar duen ala ez galdetzea Europako Batasuneko Lege Auzitegiari.

Parisen eginiko prentsaurreko batean jakitera eman zuen defentsak urrats berria eta, Giza Eskubideen Ligaren egoitzan gauzatu zen agerraldian Sorzabalen auziak sor zezakeen aurrekari larriaz ohartarazi zuten, abokatuek zein Bake Bidea eta LDHko ordezkariek.

Tortura aztergai

Parisek iaz erabaki zuen Sorzabalen aurka aurkezturiko bi euroaginduei bide ematea. Alta, presoaren defentsak Istanbulgo Protokoloan onarritutako tortura txostena aurkeztu zuen auzian zehar eta Parisko Auzitegiak ontzat eman zituen adituek eginiko azterketak.

Ondorioz, 2001ean Guardia Zibilak Sorzabal Hernanin atxilotu zuenean eginiko tortura salaketen inguruko informazioa eskatu zion Madrili Parisko Auzitegiak. Izan ere, preso irundarra bisitatu ostean Parisko Auzitegiak izendatu zituen adituek egin zituzten txostenetan Sorzabalen tortura salaketak «sinesgarriak» zirela baieztatu zuten.

Laugarren euroagindua bidean

Iratxe Sorzabal Baigorroin atxilotu zuen Frantziako Poliziak David Plarekin batera, 2015eko irailaren 22an, eta pasa den otsailaren 5ean egin zieten epaiketan zazpi urteko espetxe zigorra ezarri zion Parisko Dei Auzitegiak Sorzabali eta bost urtekoa Plari.

Espetxeratua izan bezain laster Espainiako Auzitegi Nazionalak Sorzabalen kontrako hiru euroagindu eskaera egin zituen 1995 eta 1996 urteen artean Asturias, Alacant eta Gipuzkoan ETAk egindako ekintzekin lotura zuelakoan. Eta Xantiana Cachenaut abokatuak jakinarazi duenez, datorren urteko otsailean aztertuko duten laugaren euroagindu baten berri eman diote Irungo presoari. Gainontzeko kasuetan bezala, laugarren euroaginduak ere Guardia Zibilaren eskuetan zegoela Sorzabalek egindako deklarazioak ditu oinarri.

RELATED NEWS