Goizeko bost eta erdietan itxi dituzte Baionan garraio publikoa eskaintzen duen Chronoplus enpresako sarbideak suzko barrikadekin. Grebalarien ekintzaren ondorioz, soilik tranbus linea bat eta 4 autobus linea daude martxan Ipar Euskal Herriko errepideetan.

Gaurkoa hirugarren greba orokorra den arren, trenbideetako langileek 13. greba eguna dute, iragan abenduaren bostean hasi baitzuten greba mugagabea.

Biarrizko aireportuan, lau hegaldi bertan behera geratu dira grebaren ondorioz, guztiak Parisko aireportuarekin loturak egiten dituztenak. SNFC tren konpainiak jakitera eman duenez, lau AHT zerbitzuetatik soilik batek funtzionatuko du gaur Estatu frantsesean. TER eskualde zerbitzuetan hamar trenetatik lauk funtzionatuko dute.

Parisko metroan, berriz, soilik bi lerro izango dira funtzionamenduan. Horren eraginez, trafiko arazo handiak izaten ari dira Frantziako hiriburuan.

Lehen aldiz sindikatu guztiek deitu dute gaurko mobilizazio eguna, CFDT sindikatu moderatua barne. Ondorioz, goizeko 10.30ean Baionako Santa Ursule plazatik abiatu den manifestazioan guztiek parte hartuko dute. Antolatzaileen arabera, 7.000 lagun inguru batu dira mobilizazioan.