Osasunaren esparruan, teknologiaren inplementazioa esponentzialki hazten ari da, eta hazkunde kurba horretan jaio da Fisify, fisioterapeuta bat poltsikoan eramateko aukera ematen duen web-aplikazioa.

Enpresak dioenez, tresna horrek, adimen artifizialaren bidez, doako diagnostiko fisioterapeutikoa egiteko aukera ematen die min edo lesio desberdinak dituzten pertsonei. «Horrela, fisioterapeutek ariketa-programa pertsonalizatua eskain diezaiekete bezeroei, euren burua suspertzeko».

Gainera, beste zerbitzu batzuk ere eskaintzen ditu, hala nola fisioterapeuta batekin bideo deia, zuzeneko txata, gomendioak, etxez etxeko fisioterapia eta abar, jendeari etxetik mugitu gabe lagundu ahal izateko.

Gaur egun, www.fisify.comweb-aplikazioa martxan dago jada, eta koronabirusak eragindako egoera sozialaren ondorioz, ustekabean handitu da eskaria, Fisifyko arduradunek diotenez.

«Egia esan, egoera honek gainditu egin gaitu, baina gure taldea sendotu dugu, eta ahalik eta modurik onenean laguntzen jarraitzen dugu, guztiek minak arintzeko tratamendua doan jasotzeko aukera izan dezaten euren etxeetan», adierazi du Egoitz Lazkano Fisifyko zuzendari exekutiboak.

Startup honek EHU eta Deustuko Unibertsitatearen laguntza du. 2020rako Estatu espainolean eta nazioartean zabaltzea du helburu. Bestalde, Demium-en laguntza ere badu; startupen ekosistemako erreferentziazko inkubagailuetako bat.