Etxepare Euskal Institutuak eta Laboral Kutxak 2015ean sortu zuten Itzulpengintza Saria, elkarlanean. Jatorriz euskaraz idatzitako literatur lanen itzulpenak saritzea du xede, «itzulpenak baitira euskal idazleak eta euren lanak nazioartean ezagutzera emateko zubia», Etxepare Institututik adierazi dutenez.

Nazioarteko itzultzaile eta argitaletxeak aurkez daitezke sarira, betiere ondorengo baldintzak betetzen badituzte: aurkeztutako liburua jatorriz euskaraz idatzitako eta argitaratutako literatur lan baten itzulpena bada, eta itzulpen hori 2019. urtean argitaratutakoa bada. Eskabideari dagokionez, itzultzaileak berak, argitaletxeak edota liburugintza, literatura edo itzulpengintzako beste eragile batek egin dezake. Sariaren oinarriak www.etxepare.eus webgunean aurki daitezke astelehen honetatik aurrera.

Sari bakarra emango da, 4.000 eurokoa, itzultzaileak eta argitaletxeak erdibanatzekoa. Izan ere, irabazleak nortzuk diren erabakitzeko orduan, aintzat hartuko dira itzulpenaren kalitatea eta literatur lana kaleratu duen argitaletxeak egindako sustapen plana ere. Halaber, 2.000 euroko laguntza jasoko dute irabazleek saria jasotzera Euskal Herrira etortzeko edo literatur lana argitaratu den herrialdean sustapen lanarekin jarraitzeko.

Hautagaiak aurkezteko epea ekainaren 26ra arte egongo da zabalik, eta sari banaketa ekitaldia Itzultzaileen Nazioarteko Egunaren inguruan egingo da (irailak 30), aurrerago adostuko duten lekuan eta egunean. Itzulpengintzako, Etxepare Euskal Institutuko eta Laboral Kutxako ordezkariek osatuko dute epaimahaia.

Etxepare Euskal Institutuak euskal kultura sustatu eta nazioartean ezagutzera emateko lantzen dituen lan ildoekin bat egiten du sariak. Literaturaren arloan, itzulpenak egiteko dirulaguntzak eskaintzeaz gain, euskal idazleentzat bidaia poltsak ematen ditu eta nazioarteko liburu azoka eta literatura jaialdietan euskal idazleek parte hartu eta euren lanak aurkeztea ahalbidetzen du.

Halaber, sari honen bitartez, Laboral Kutxak euskara eta euskal kulturarekiko konpromisoa berretsi nahi du, baita «sarritan ezkutuan geratzen den itzultzaileen lana nabarmentzeko ahalegina» ere.