Pentsiodunen mugimendua itzuli egin zen atzo, koronabirusak behartutako bi hilabete baino gehiagoko itxialdiaren ostean, eta Euskal Herriko 40 bat udalerritako udaletxeen aurrean bildu zen, manifestarien arteko bi metroko distantziari eutsiz eta maskarak erabiliz.

Bilbokoa izan zen jendetsuenetako bat. Bizkaiko Pentsiodunen Mugimenduko bozeramaileek adierazi zutenez, protesta «sinbolikoen» ereduari eutsiko diote osasun alertak irauten duen bitartean, «mobilizazio masiboak» baztertuz.

Udaletxera sartzeko eskaileretan “Egoitzen pribatizazioari ez” zioen pankarta bat zabaldu zuten, «Jo eta ke, irabazi arte», «egoitza publikoak» eta «pentsiodunak aurrera» leloak oihukatzen zituzten bitartean. Mobilizazioaren hasieran, egoitzetan hildako pertsona guztien eta pandemian hildako bi mobilizazio-lagunen omenezko minutu bateko isilunea egin zuten.

Ondoren Bizkaiko pentsiodunen bozeramaile batek hartu zuen hitza, eta koronabirusaren ondorioen larritasuna gizarte osoan arintzen ari den arren, baita egoitzetan ere, «erne egon beharra» dagoela adierazi zuen. «Ezin gara lasaitu, aztertu behar ditugu atzemandako gabezia larriak, oraindik berriro pandemiaren gorakada izateko arriskuak desagertu ez direlako», nabarmendu zuen.

Egoitzen pribatizazioa gaitzetsi zuten pentsiodunek eta «lan sanitario duina» aldarrikatu zuten. «Kalitatezko sistema publiko unibertsal eta doakorantz joan behar gara ahalik eta azkarren, egoitzak eta adinekoen arretarako beste zerbitzu batzuk pribatizatzeko bideari ateak itxiz, non patronalak onura baino ez dituen bilatzen», azaldu zuen bozeramaile batek.

Era berean, elkartasuna eta babes morala adierazi zieten hildakoen familia eta gertuko guztiei eta adinekoak behar bezala zaintzeko ahal duten guztia eman duten langile guztiei.

«Arduragabekeria»

Bere hitzaldian, Jon Fanok erakunde publikoen eta patronalen «arduragabekeria» salatu zuen egoitzetan eta mendekotasuna duten adineko pertsonentzako arreta zerbitzuan izandako «azpiegitura, bitarteko eta langile faltagatik».

«Egoera horren aurrean, behin eta berriz esango diegu erakundeei –eta gure kasuan Unai Rementeriari–, behingoz propaganda hutsalak egiteari utz diezaiotela eta egoitzetako eta etxeko arretako arazoak benetan konpon ditzatela», adierazi zuen Fanok. Maskarak doakoak izan beharko liratekeela ere esan zuten, «pertsona askok, jasotzen dituzten miseriazko pentsioekin, erosteko zailtasun handiak dituztelako».

Polemika

Pentsiodunen elkarte batzuek mobilizazioekin bat ez egitea erabaki zuten, horren aurrean, Fanok esan zuen «etxean ezer egin gabe geratzeak ez duela ezer konpontzen», eta «ezer aldatu nahi ez duten erakunde patronalei bakarrik egiten diela mesede».

«Argi dugu mugitzen ez bagara eta protestatzen ez badugu, ez direla arazoak konponduko», adierazi zuen, kritikoak protestekin bat egin eta «elkarrekin borrokatzen jarraitzeko» animatu zituen bitartean.