Euskaraldiaren esparruan antolatutako hirugarren eta azken solasaldia atzo egin zen Donostiako Tabakaleran. Saioa, “Arlo sozioekonomikoaren hizkuntzak” izenekoa, Maite Artola kazetariak gidatu zuen, eta parte hartzaileak Aritz Otxandiano Fagor Taldeko Berrikuntza Sozialeko arduraduna, Naiara Goia Arantzazuko Gizarte Berrikuntza Laborategiko zuzendaria eta Mari Jose Aranguren Orkestra Lehiakortasuneko Euskal Institutuko zuzendaria izan ziren.

Ekitaldian, hiru parte hartzaileek azaldu zuten zein den euskararen egungo egoera beren erakundeetan eta, oro har, sektore sozioekonomikoan, beste zenbait gairen artean, hala nola trantsizio ekologikoa, digitalizazioa eta pandemiaren ondoriozko krisi ekonomikoa.

Mari Jose Arangurenek deitoratu zuenez, euskara jakitea «ez da baldintza enpresa pribatu askotan», batez ere profil teknikoak bilatzen dituzten enpresetan. Aldiz, belarriprest'rola positiboki baloratu zuen, euskaldunek ohiturak aldatu gabe euskara erabiltzen jarrai dezaketelako beraien artean.

Naiara Goiak euskararen «kohesio eginkizuna» nabarmendu zuen. Hala ere, oraindik ez direla «inertziak» aldatu uste duen, batez ere lan esparruan, gazte euskaldun asko izan arren: «Euskara lanerako balio duen hizkuntza ez dela pentsatzen da da». Horregatik, euskarari «prestigioa ematea» eta «eremu guztietan normalizatzea» eskatu zuen.

Bezeroen garrantzia

Azkenik, Otxandianok azaldu zuen enpresak eta erakundeak aldaketak egitera bultzatzen dituzten hiru faktore daudela. Lehenik eta behin, barne motibazioa. Adibidez, Fagorren kasua aipatu zuen, «non langileen %70 baino gehiago euskaldunak diren». Enpresako arduradunaren arabera, duela hogei urte euskarak ez zuen presentzia handirik korporazioan. Egun, ordea, euskara eta ingelesa eskakizun maila berean daude. Bigarrenik, esparru politikotik eratorritako lege-betebeharrak ezarri zituen. Azkenik, Otxandianok bezeroen iritziaren garrantzia nabarmendu zuen, bere ustez, «inpaktu handiena duena».

Atzoko solasaldia Kutxa Fundazioak eta Euskaraldiak 2020ko edizioan antolatu duten azkena izan zen.