Itsasoa haserre ibili da azkenaldian eta aspaldiko gogorren kolpatu du euskal kostaldea. Kai muturrak, txalupak eta zubiak puskatu ditu, kaleetara sartu da eta urez bete du negozio ugari. Ekaitz baten segidan etorri da hurrengoa, babes gisa balio duten azpiegitura txikituak konpontzeko apenas denborarik utzi gabe, ezta kalteak zenbatzeko ere.

Halere, hedabideetan joan den asteburuko denboralearen kalteen zifra batzuk atera dira dagoeneko: Aseguruen Konpentsazio Kontsortzioak 14 eta 16 milioi euro aipatu ditu, Bizkaiko Foru Aldundiak bi milioiko zenbakia eman du eta Gipuzkoakoak 400.000koa errepideak konpontzeko.

Ana Oregi Lakuako Gobernuko Ingurumen sailburuak, aldiz, goizegi iritzi dio zifrak emateari, «oraindik kalteak aztertzen ari direlako» eta «kontu oso delikatuak direlako». Atzo Efe agentziak jaso zuenez, behin denboraleak igarota, eta olatu bortitzek eragindako txikizioen berri zehatzagoa dutenean, euskal kostaldearekin lotura duten instituzio guztiak gonbidatu ditu mahaian eseri eta egoera aztertzera: udalak, Bizkaiko eta Gipuzkoako foru aldundiak eta gobernu espainola.

Iragarri zuenez, heldu den astearen amaieran izanen litzateke bilera Gasteizen eta kostuez mintzatzeaz gain, konponketa planak diseinatzeari ekitea izanen litzateke asmoa.

Normaltasuna eta segurtasuna

Donostiako Udal Gobernuak 4 eta 4,5 milioi arteko zifra eman zuen atzo. Hasierako kalkulua da eta Udalak eta Kosten Mugapeko atalak ordaindu beharreko kalteak hartzen ditu barrenean. Txikizio horien artean Paseo Berriko horma, Kontxako kabinak, hondartzetarako sarbideak, zubiak eta Zurriolako kai muturra nabarmendu zituen.

Horiei batu behar zaizkie egun hauetako garbiketa eta konponketa lanak, kaian egin beharreko lanak, eta orain arte sartzeko aukerarik izan ez den hainbat gune, besteak beste, uhartea eta Ondarretako eta Zurriolako kabinak. Ondorioz, zifrak goiti eginen du.

Bi izan dira Donostiako Udal Gobernuaren lehentasunak, Nora Galparsoro Azpiegitura eta Zerbitzuetako zinegotziak azaldu zuenez: «Hiria normaltasunera bueltatzea eta kaltetutako puntuak segurtatzea». Krisi mahaia martxan egon zen atzo egun osoan eta denboraleari aurre egiteko neurriak ezarri zituen. Adibidez, Salamanca pasealekua itxi zuen ibilgailu eta oinezkoentzat. 50 boluntario inguruk ere bat egin zuten langileekin, herritarrek eta Donostiako Piratek. 18.00etatik aurrera jendea debekatutako lekuetara ez sartzea kontrolatu zuten.

Bestalde, Galparsorok adierazi zuen Udal Gobernuak espero duela Kosten atalak bere lanak azkar egitea, premiazkoa baita hainbat tokitan moldaketak egitea. Paseo Berriko horma eta batez ere Zurriolako kai muturra babes garrantzitsuak dira hiriarentzat eta lehenbailehen konpondu behar dira.