Gipuzkoako Aldundiak iragarri du urte amaiera baino lehen 24 orduko hiru krisi zentro zabalduko dituela sexu indarkeriaren biktima diren emakumeei arreta emateko, eta beste bi babes zentro, Debagoiena eta Goierri eskualdeetan. «Helburua da Aldundiak gizarte larrialdiko zerbitzuaren bidez ematen duen arreta indartzea, hurbileko hiru zentro espezializatu zabalduta, emakume bakoitzari erantzun integrala emateko», azaldu du Markel Olano diputatu nagusiak indarkeria matxistari aurre egiteko erakunde arteko mahaiaren aurkezpenean.

Mahai horren sorrerarekin, 24 orduko arreta-zentroak irekitzearekin batera, lortu nahi dutena da indarkeria-mota horri aurre egiten diotenei arreta integralagoa eskaintzea. Hala, erakunde guztiek gure gizartea gogor astintzen duen indarkeria matxista desagerrarazteko duten konpromiso irmoa aldarrikatu dute.

Maite Peña Gizarte Politiketako diputatuak defendatu duenez, indarkeria matxistaren arazoaren konplexutasunak eta izaerak eskatzen dute berariazko esku-hartze eredu bat hartzea, eta, horregatik, duela lau urte abian jarritako entzuteko eta aurrez ebaluatzeko prozesuaren ondoren, ereduaren printzipio eta gako batzuk definitu dira, «irizpide homogeneo eta adostuekin». Zehazki, hobekuntza arloak identifikatu dira, eta, horien ondorioz, arreta ereduaren funtsezko printzipioak jardunbide zehatzetan ezartzen laguntzen duten jarraibide zehatzak sortu dira.

Diputatuak adierazi du erantzuna antolatzeko eta zerbitzuak emateko moduak eragin nabarmena duela lortzen diren emaitzetan eta horien eraginkortasun mailan, eta gaineratu du indarkeria matxistaren arazoaren izaerak eta konplexutasunak «justifikatu egiten duela esku hartzeko eredu espezifiko bat egokitzeko beharra, ikuspegi feministatik, genero ikuspegitik eta giza eskubideetatik abiatuta. Gainera, emakume bakoitzaren duintasuna, autonomia, segurtasuna, intimitatea, gizarteratzea eta erreparazioa bermatu behar ditu».