Orain bi urte, Damian McCarthy zinegile irlandarrak, ‘Oddity’ estreinatu zuen. Film hark Donostiako Fantasiazko eta Beldurrezko Zinemaren 35. Asteko publikoaren saria irabazi zuen, 8,34ko puntuazioarekin. Beldur psikologikoa eta naturaz gaindiko elementuak uztartzen ditu, eta atmosfera itogarri eta ikuspegi psikologiko sakona ditu bereizgarri. 

McCarthy, beldurraren eremuan eta Irlandako giro berezian murgilduta jarraituz, ‘Hokum’ izeneko lan berriarekin dator. Abiapuntua sinplea dirudien arren, argi erakutsi du gustuko duela premisa minimalistak amesgaizto psikologiko motel eta gogaikarri bihurtzea. 

Istorioan, beldurrezko eleberriak idazten dituen idazle bat, Ohm Bauman, Irlandako ostatu batera joango da gurasoen errautsak zabaltzera. Baina, ez daki sorgin batek etxea madarikatu duela. Irudipen kezkagarriak eta ustekabeko desagerpen batek iraganeko iluntasunari aurre egitera eramango dute, gero eta tentsio handiagoan.

‘Severance’ telesail zoragarriaren protagonista, Adam Scott, sartuko da idazlearen azalean.

Damian McCarthy.

Irlandako zinema zuzendaria da eta bere filmak beldur psikologikoaren eremuan kokatzen dira. Zinemagile independentea izanik, sarritan finantzaketa mugatuekin lan egin du, baina horrek ez dio kalterik egin bere filmen kalitateari; aitzitik, askotan bere sormenaren eta originaltasunaren motor bihurtu da.  Atmosfera zainduak eta tentsio psikologiko etengabeak dira bere zinemaren ezaugarri nagusietako batzuk.