Prezioek gora egin dute urrian Gipuzkoa, Bizkaia, Araba eta Nafarroan irailarekin alderatuta, Kontsumorako Prezioen Indizearen (KPI) datuen arabera.
INE estatistika Institutu espainolak berri eman duenez, Araban izan da igoerarik handiena, %0,9koa. Gipuzkoan %0,7 hazi dira prezioak; Bizkaian, %0,5; eta Nafarroan, %0,2.
Azken hamabi hilabeteei erreparatuz gero, inflazio tasak behera egin du herrialde guztietan. Nafarroan bost hamarren jaitsi da; Araban eta Bizkaian, lau hamarren; eta Gipuzkoan, bi hamarren.
Inflazio tasaren beherakadan gehien eragin duten faktoreak jaki eta alkoholik gabeko edariak izan dira, INEren arabera.