NAIZ
Irun

Korrika urtemuga jaia ospatuko dute otsailaren 11n Irunen

Otsailaren 11n Korrikaren urtemuga jaia ospatuko dute Irungo Ficoba erakustazokan. Bertan, aurten 20. edizioa egingo dela aprobetxatuta, lehen Korrika izateko «ideia ero hori» izan zutenak omendu nahi dituzte.

Korrika 1980ko azaroaren 29an jaio zen, eta ordutik 37 urte pasa badira ere, indarrean dago euskararen aldeko lasterkaldia. 37 urte igarota, 2017ko martxoaren 30ean abiatuko da 20. edizioa, eta zenbaki borobil hori urtemuga jai batekin ospatuko du AEK-k, «ideia ero bezain zoragarria izan zuten horiek omentzeko».

Ohar baten bidez jakinarazi dutenez, «ideia ero hori» mahai baten inguruan egin ziren hainbat bileratan hasi omen zen gauzatzen, eta «esan daiteke otordu batean eman zitzaiola behin betiko forma». Horrexegatik, urtemuga jaiaren ardatza bazkari berezi bat izango da, «ezohiko otordua, sorpresaz betea».

Jaia Irungo Ficoba erakustazokan ospatuko da, otsailaren 11ko eguerdiko 13:00etan hasita, eta 19:30 aldera amaituta, Sarrera 20 €-koa izango da, eta antolaketa-lanak errazteko, izena emateko gunea prestatu dute euren webgunean.