Reala, ezinean Valentziaren aurka (3-1)

Aise nagusitu da Valentzia, etxean, ezinean aritu den Realaren aurka (3-1). Mari Pazek egin ditu valentziarren hiru golak, eta Beristainek egin du lotsarena donostiarrentzat.

NAIZ|VALENTZIA|13/01/2018 13:00

Iragan astean Athleticen aurkako derbia galtzetik zetorren Reala, eta Valentziaren aurkako neurketa zail bati egin behar izan dio aurre. Ez du asmatu, baina, punturik eskuratu gabe itzuli beharko du Zubietara.

Mari Paz izan da partidako protagonista nagusia. Berak sartu ditu etxekoen hiru golak, 33. minutuan lehena. Ordurako, baina, arriskua eramana zuten etxekoek Mariasun Quiñonesen ate inguruetara. Behin lehen gola eginda segidan iritsi da bigarrena, 44. minutuan. 2-0 iritsi da neurketa atsedenaldira.

Bigarren zatia lehenengoaren haritik hasi da. Realak, neurketaren noranzkoa aldatu ezinean, hirugarrena jaso du 58. minutuan, eta horrekin amaitu da partida. Egin ditu talde txuri-urdinak aldaketak, baina ez dute berebiziko eraginik izan hauek. Hala ere, Beristainek lotsarenak egin ditu 89. minutuan.

Atseden hartuko dute donostiarrek datorren astean, baina ostean bi neurketa zailekin topatuko dira. Madrilgo Atletikoren bisita jasoko dute Zubietan, eta ondoren Bartzelona ahaltsuaren aurka lehiatu beharko dituzte indarrak etxetik kanpo. Egutegi gogorra, beraz, donostiarrena.