NAIZ
DONOSTIA

Errefuxiatuentzako lehen harrerako aterpetxe bat zabalduko dute Oñatin, ehun plazarekin

Nazioarteko babesa eskatzen duten pertsonentzako lehen harrerako aterpetxe bat irekiko du Lakuak bigarren hamabostaldian. CEAR Euskadik kudeatuko duen zentro hau Oñatin egongo da eta ehun lagunentzeko edukiera izango du. 

Errefuxiatuen aldeko bandera bat, Donostian egindako protesta batean. (Jon URBE/FOKU)
Errefuxiatuen aldeko bandera bat, Donostian egindako protesta batean. (Jon URBE/FOKU)

Ohar baten bitartez Lehendakaritzak azaldu duenaren arabera, egoera argitzeko zain dauden eta nazioarteko edo aberrigabeentzako babesa eskatu duten pertsona edo familiei ostatua eta orientazioa eskaintzea izango da Oñatin zabalduko duten aterpetxe honen helburu nagusia.

«Salbuespen gisa, premia bereziko egoerak ematen direnean, zentroak zaurgarritasun-egoeran edo iragaitzazko egoeran dauden, edo Euskadira iritsi berriak diren migratzaileak hartu ahal izango ditu», oharrak zehazten duenez.

Aterpetxeak 100 plaza izango ditu hasieran, beharra izanez gero kopuru hori handitzeko aukera badago ere. Aterpetutakoek hiru hilabete eman ahal izango dituzte zentroan, nahiz eta irizpide teknikoen arabera, epe hori laburtu edo luzatzeko aukera egongo den. 

Zentroaren kudeaketaren zuzendaritzaz CEAR Euskadi eta Lakuako Giza Eskubide, Bizikidetza eta Lankidetzaren Idazkaritza Nagusia arduratuko dira, Enplegu eta Gizarte Politiketako sailarekin harremanetan. 

Lakuak azaldu du proiektua Oñatiko Udalarekin eta Gipuzkoako Aldundiarekin ere kudeatuko dutela, errefuxiatu eta migratzaileei laguntzeko lanean diharduten bertako erakunde eta plataformekin elkarlanean. 

Azkenik, nabarmendu dutenez, aterpetxe honekin «kolektibo horietako pertsonek bizi duten babesgabetasun-egoerari erantzun nahi zaio, euren oinarrizko beharrei babesa babesa eskainiz, pertsona horien egoerarekin eta interesekin bat datozen hautabide bideragarriak eta egonkorrak bilatzen diren bitartean».