Eustatek bildutako datuek ere adierazten dute langabezia apaldu egin dela azken hiruhilekoan, baina tasa %9,49an kokatu dute. Iturri hau zein INE baliatuta, Gaindegiak azpimarratu du hamarkada bat atzera egin behar dela maila horretako langabezia aurkitzeko. 

Nafarroa Garaian tasaren jaitsiera garrantzitsua eman dela nabarmendu du Gaindegiak (-1,8, INEren datuen arabera), Bizkaian (-0,2; INE) eta Ipar Euskal Herrian (-0,1; Gaindegia) jaitsiera hori leunagoa izan den bitartean. 

Araban langabezia tasak kontrako joera izan du, Eustaten zein INEren datuek erakusten dutenez (+0,4 eta +0,2, hurrenez hurren). 

Gipuzkoan, aldiz, INEk adierazten du langabeziak gora egin duela (+0,5) eta, aitzitik, Eustaten datuek diote jaitsi egin dela (-0,3). 

Gaindegiak azpimarratu duenez, bi iturrien emaitzak ez datoz bat ez biztanleria aktiboa ezta langabetu gordinen azken hiruhileko bilakaera joeran ere: Eustatek EAEko pertsona aktiboen (-3.400) eta langabetuen (-1.100) jaitsiera eman dela aditzera ematen du, INEk, ordea, pertsona aktiboen (+6.300) eta langabetuen (+900) gorakada.

Joerak alde batera, Bizkaian kokatzen da Euskal Herriko lurraldeen arteko langabezia-tasa handiena (%11,23). Hala berresten du Eustatek ere, Arabaren pare kokatuz (%11,30). Ostera, Ipar Euskal Herriak eta Gipuzkoak dute langabezia tasa apalena.

Europar Batasunean ere langabezia-tasak gora egin du azken hiruhilekoan (+0,20), behin-behineko datuen arabera. Hala, Euskal Herriko langabezia tasa EBkoa baino 2,3 puntu handiagoa izaten jarraitzen du (INE).