Elkanorekin eskutik XVI. mendeko Getariarako bidea egiten du ‘Ortzimugaren sustraiak’ liburuak

XVI. mendeko Getariarako hurbilketa fotografikoa izan nahi du ‘Las raices del horizonte / Ortzimugaren sustraiak’, Elkano fundazioaren eta Xibarit elkartearen ekimenez argitaratu berri duten liburukiak. Liburukiaren 500 ale zenbakitu eta mugatu argitaratu dira.

Amalur ARTOLA|28/02/2020
Elkano
Argitalpenaren aurkezpena, Donostiako Koldo Mitxelena kulturunean. (NAIZ)

‘Las raices del horizonte / Ortzimugaren sustraiak’ argitalpena ostiral honetan aurkeztu dute Donostiako Koldo Mitxelena Kulturunean eta bertan izan dira liburuaren egileak, Joseba Urretabizkaia eta Alvaro Bermejo, Elkano Fundazioko proiektuen koordinatzaile Rafael Zulaika eta Itxaro Borda, ediziorako hitzaurrea osatu duena.

Zulaikaren hitzetan, XVI. mendeaz ugari idatzi bada ere «aro ezezagun bat izaten jarraitzen du, eta uste dugu gai honek merezi dituela ikerketa eta begirada berriak». Bide horretan, argitalpenak Juan Sebastian Elkanoren eskutik aro horretarako Getariarako hurbilketa izan nahi duela argitu du. Zehazki, liburukiak 90 argazki inguru biltzen ditu. Horietan kostalde gipuzkoarreko herri honetako zenbait txoko identifikatu ahalko ditu liburua eskuartean duenak. «Herriko kaleetan barrena bertako jendearekin ibiliz, garai hartako euskal gizartearen testuingurua azaltzen duen erretratu kolektiboa egiten du lanak», nabarmendu dute aurkezpenean. Argitalpena, momentuz, Donostiako Hontza liburu-dendan dago eskurgai. 500 ale zenbakitu eta mugatu argitaratu dira eta 35 euroren truke eskura daiteke.

Egileek azaldu dutenez, Elkanoren «garrantzi globalari buruzko ikerketa batekin» abiatu zen proiektua, «ikuspegi historiko garaikide batetik» eta «makrotik mikroetara»-ko bidea egiteko helburuarekin. Hala, XVI. mendekon Getarian barneratzen da eta garaiko Sevillara ere egiten du joanetorria, Kontratazio Etxera. Elkanok Espezieen Uhartedira egin zuen bigarren bidaia ere aipatzen da liburuan eta Andres Urdaneta ere azalduko zaio irakurleari: Elkanok lehen mundu-bira gauzatu eta 40 urtera itzulerako bidea ekialdetik egitea lortu zuen Udanetak.

Itxaro Bordaren hitzaurrea

Itxaro Bordak ondu du argitalpenaren hitzaurrea. Aurkezpenean haurtzarotik itsasoarekiko duen miresmenaz jardun da idazle baionarra: «Nire familia barnealdekoa da baina orain kostaldean bizi naiz eta eskura daukat itsasoaren zoramen hori, bizitzarena eta heriotzarena».

Hamar urte zituela gizakia ilargira heldu izana miresmenez jarraitu zuela ere esan du, «baina gure adinekoek ez zuten sinesten. Elkanoren bira ere zaila izango zen sinesten jende arruntarentzat, baina beste ikuspegi sozial bat ireki zuen, eta hori Elkanori esker izan zen», esan du. Aldi berean, zenbait argazkitan egungo getariarrak garaiko jantziekin erretratatu izana ere goratu du, «hor sentitzen baita herri baten bizitza, herri baten burbuila hori».

 

 

Elene CARRETO - FOKU
Loading player...


Konfinamenduaren erronketako bat da geure buruak eta gorputzak zaintzea. Bide horretan, martxoaren 30etik aurrera, NAIZek zumba saioak eskainiko ditu egunero, astelehenetik ostiralera, Elene Carreto dantzari durangarraren eskutik. Hauxe lehen saioa.