Ikastolen Elkarteak langile guztien kontratuak mantentzea gomendatu die ikastolei

Koronabirusak eragindako ezohiko egoeraren aurrean, Ikastolen Elkarteak zentroetan zerbitzuak betetzen dituzten langile guztien lan baldintzak bermatu behar liratekeela adierazi du, gutxienez ikasturtea bukatu arte, eta, ondorioz, gomendatu du langile guztien kontratuak mantentzea eta kontratu etenik ez egitea.

NAIZ|17/03/2020
Ikastola
Balmasedako Zubizaharra ikastola. (Luis JAUREGIALTZO/FOKU)

Ikastolen Elkarteak astelehenean proposatu zizkien ikastolei egungo egoeran dituen lehentasunak, eta astearte honetan ezagutarazi ditu EAEko ikastoletako lan hitzarmeneko mahaian.

Elkarteak jakinarazi du «oso argi» dituela zeintzuk diren bere lehentasunak «15 egunetik harago joango dela aurreikus daitekeen egoera honetan», eta lehenbizikoa osasuna dela ziurtatu du. Horren baitan, langileek, ahal den guztietan, etxetik lan egiteko gomendioa zabaldu eta bultzatu du.

Beste lehentasunetako bat hezkuntza zerbitzua bermatzea da, eta horretarako, eskura dituen baliabide guztiak jarri ditu ikastolen eskuetan, inolako kosturik gabe.

Ikastoletako administrazioetako langileekin egin bezala, irakasleek ere ahal den neurrian etxetik lan egitea bultzatu du. Bigarren multzo horretan daude hezkuntza etapa desberdinetako irakasleak, heziketa bereziko langileak, hezkuntza laguntza espezialistak eta 0-3 urteko zikloko hezitzaileak ere.

Zerbitzuak ematen segitzeko arazorik handienak dituztenak

Hain zuzen, 0-3 urteko zikloko hezitzaileek eta zerbitzuetako beste langileek (garbiketa, jangela, garraioa eta eskolaz kanpokoak) dituzte arazorik handienak ematen dituzten zerbitzuak eskaintzen jarraitu ahal izateko.

«Arlo honetan ere, garbi dugu lehentasuna: zerbitzuak betetzen dituzten langile guztien lan baldintzak bermatu beharko genituzke, gutxienez ikasturtea bukatu arte. Ondorioz, gure gomendioa da langile guztien kontratuak mantentzea, kontratu etenik ez egitea. Horrek esan nahi du ezinbesteko kausagatik Aldi baterako Enplegu Erregulazio Espedienterik ez egitea eskatu diegula ikastolei, baldin eta bide hori ez bada lan baldintzak betetzeko helburuarekin erabiltzen», azaldu du.

Elkartasuna

Gaur egungo salbuespen egoeran seguru asko zerbitzuak ematea ezinezko izango zaien neurrian, ikastolek ezin izango dituzte zerbitzuetako kuota horiek ere kobratu. Horregatik, «ikastolen filosofia eta baloreak oinarri hartuta, ikastoletan langile hauenganako denon konpromisoa eta elkartasuna erakutsi beharko genukeelakoan gaude», esan dute.

«Zerbitzu ezak sortuko dituen galerak denon artean finantzatzen ahalegindu beharko genuke. Gurasoen aldetik, zerbitzuen kuota zati bat ordainduz, eta ikastola bakoitzak kostuen beste zatia bere gain hartuz, adibidez. Eta azken erabaki honek ikastolaren bati egoera ekonomiko larria ekarriko balio, Elkartasun Kutxaren bidez ezohiko prozesu batez laguntzea proposatzen dugu», azaldu du Ikastolen Elkarteak.

NOTICIAS RELACIONADAS

 

NAIZ
Loading player...


KONPROMISOA, ERANTZUKIZUNA, ZORROZTASUNA

Elene CARRETO - FOKU
Loading player...


Konfinamenduaren erronketako bat da geure buruak eta gorputzak zaintzea. Bide horretan, martxoaren 30etik aurrera, NAIZek zumba saioak eskainiko ditu egunero, astelehenetik ostiralera, Elene Carreto dantzari durangarraren eskutik.