Estreinako lana orain atera badute ere, Konpost ez da talde berria. Laukote gasteiztarrak 10 kantuz osatutako diskoa plazaratu berri du martxo honetan, Erraia kolektiboaren eskutik, eta uste baina gehiago luzatu den prozesuaren emaitza aurkezten dabiltza orain.

Ohikoa dute musikariek haien lana definitzeko erresistentzia, entzuleak bere lana egin dezan edo. Konposten kasuan, kantuak entzunda, esan liteke istorio xelebreak asmatu edo kontatzeko joera duela taldeak, abestien izenburuek adierazten dutenez: adibidez, 'The last human on Earth', 'Sin plomo 72 litro' edo 'Gasteiz rules'. Gitarra zikin eta bateria pisutsuekin, rocka eta zenbait kantuetan, bluesa, heltzen zaigu belarrietara Konposten eskutik.