«Intza, Aurore eta beste guziak libre! Auzirik ez» lelopean, manifestazio jendetsua izan zen atzo Donibane Garazin, Baxenabarreko Libre! dinamikak deituta. Poliziaren iturrien arabera, 1.600 lagun inguru bildu ziren mobilizazioan.

Datorren asteazkenean Parisen epaitua izango den Intza Otxandabaratzen eta Madrilen 04/08 sumarioaren barruan epaitua izango den Aurore Martinen kasuak salatzeaz gain, euskal herritarren aurkako epaiketa hauek garaiz eta lekuz kanpo daudela salatu zuten.

217 hautetsi agertu dira Otxandabaratz libre uztearen alde eta alderdi politiko guztietako ordezkariek babestu dute Aurore Martin.