GARA
VILLABONA

Bere ibilbidea bukatutzat eman du Mintzola Fundazioak

Mintzola Fundazioak bere amaiera erabaki eta ahozkotasunaren ikerkuntzan eta hedapenean Mintzolaren lekukoa har dezan proposatu dio Euskaltzaindiari. Subijana Etxeak Xenpelar Dokumentazio Zentroaren eta Bertsozale Elkartearen egoitza izaten jarraituko du.

Mintzola Fundazioaren ibilbidea amaitutzat ematea erabaki dute, aho batez, patronatuko kideek. Bertsogintzatik harago, ahozko gainerako diziplinetan gehiago sakondu eta eragiteko beharrak bultzatuta, azken urtebete honetan bere helburuen eta egitekoaren inguruko gogoeta burutu du Mintzola Fundazioak.

Gogoeta prozesu horren ondorioz, patronatuko kideek aho batez erabaki dute fundazioaren ibilbidea amaitutzat ematea eta ahozkotasunari buruzko ikerkuntza eta hedatze lanaren lekukoa Euskaltzaindiak har dezan proposatzea.

Villabonako Subijana Etxeak, berriz, Xenpelar Dokumentazio Zentroaren eta Euskal Herriko Bertsozale Elkartearen egoitza izaten jarraituko du aurrerantzean ere.

Hartutako erabakiak Ahozko Lantegiaren eta Bertsozale Elkartearen proiektuak fisikoki banatzea dakar eta, Mintzolako kide diren erakunde eta eragileek hala adostuta, ahozkotasunaren lanketa beste modu batera bideratzea ekarriko du.

Euskal Herriko Bertsozale Elkartea, Gipuzkoako Foru Aldundia, Villabonako Udala, EHU eta Kutxa Fundazioa bat etorri dira «Mintzola Fundazioak euskarari eta euskal kulturgintzari egindako ekarpena» azpimarratzeko garaian, «urte hauetan guztietan hamaika ikerlan eta proiektu sustatu baititu».

Aldi berean, eragile guztiek esker ona adierazi nahi izan diete «urte hauetan guztietan Ahozko Lantegian lanean jardun diren pertsona eta eragile guztiei, izan teknikari, aditu, ikertzaile, herritar nahiz erakunde».

Berriki egindako batzarrean patronatuko kideek, beraz, fundazioa desegin eta Ahozko Lantegiaren jarraipena Euskaltzaindiaren esku uzteko proposamena hobetsi dute. «Azken honek baiezkoa eman ostean, inplikatutako eragileek, euskarazko ahozkotasunaren ikerketari eta dibulgazioari jarraipena eman asmoz, prozesu bat abiaraziko dute irailetik aurrera, errelebo horren inguruko baldintzak modu egokian eta adostuan gauzatu ahal izateko», adierazi dute.

Mintzola Ahozko Lantegia 2008an sortu zen. Bertsolaritzatik abiatuta, ahozko tradizioaren gaineko hausnarketari eta ahozkotasunari loturiko diziplinen arteko elkarreragina bultzatzea izan du helburu azken urte hauetan guztietan, gizartearen premia berriekin uztartuz eta, era berean, diziplina horiek indartuz.

«Horretarako, bertsolaritzaren ikerketan sakontzen eta, horietan landutako hausnarketak gogoan, euskaraz diharduten beste ahozko kultur sorkuntzetara eta nazioarteko beste kantu inprobisatuetara zubiak eraikitzen saiatu gara azken hamarkada honetan», diote.

Euskararen biziberritzeak «guztion arteko elkarlana eta ekarpena» behar duela iritzita, urte hauetan guztietan Mintzola Fundazioko patronatu izan diren kideak elkarlanerako prest agertu dira.