Joan den udako ekainetik abuztura bitartean egindako bederatzi NAIZ Kontzertuak beremitituko dira abenduaren 3tik 11ra. Egunero, 22.00etan, Gatibu, Nøgen, Zetak, Huntza, ETS, Belako, Esne Beltza, Liher eta Skabideanen kontzertuetako bat emango da, irekian eta doan, NAIZen.

NAIZ Kontzertuen lehen faseko kontzertuei dagokienez, lehen emisioa Azpeitiko Sanagustin Kulturgunean egin zen Gatiburen kontzertua izango da, abenduaren 3ean. Hurrengo egunetan Nøgen abenduaren 4an; Zetak, abenduaren 5ean (biak Azpeitin eginda); Huntza, abenduaren 6an (Durangoko Plateruenan grabatua) eta En Tol Sarmiento, abenduaren 7an (Bilboko Santana 27 aretotik) ikusi ahalko dira.

Bigarren faseko kontzertuak, sarrera fisikoak eta streaming bidezkoak zituztenak, abenduaren 8tik aurrera emango dira, Sanagustin Kulturgunean ospatutako Belako taldearen kontzertuarekin. Abenduaren 9an, Esne Beltza (Bermeoko Kafe Antzokian grabatua); abenduaren 10ean, Liher (Donostiako Kafe Antzokitik); eta, azkenik, Skabidean, abenduaren 11n (Iruñeko Totem Aretoan).

Kontzertu horietako bakoitzaren errepikapena irekian eta doan izango da naiz.eus/musika webgunean 24 orduz, argitaratzen den eguneko 22:00etatik hurrengo eguneko 22:00ak arte.

Abenduaren 12 eta 13an 48 orduz kontzertu guztiak berriz nahieran ikusteko aukera egongo da.

Ekimenaren arrakasta

NAIZ Kontzertuen lehen fasea ekainaren 5etik uztailaren 3ra bitartean egin zen, Gatibu, Nøgen, Zetak, Huntza eta ETSren kontzertuekin, streaming bidez. Ekimenak arrakasta handia izan zuen, lehenengo 24etan 1.000 bonu eta sarrera baino gehiago saldu baitziren.

Bigarren fasea uztailaren 10etik 31ra bitartean egin zen, formatu mistoan, sarrera fisikoak eta streaming bidezkoak aldatzen zituena. Belako, Esne Beltza, Liher eta Skabidean taldeek kontzertu guztietan «sold out» lortu zuten.