Ion Salgado

Kongresu espainiarrak aurrekontuak onartu ditu ERC, EH Bildu eta EAJren laguntzarekin

Espainiako Gobernuak beharrezko laguntza lortu du Estatuko aurrekontuak aurrera ateratzeko, aldeko 188 boto lortu ondoren, neurri batean, ERC, EH Bildu eta EAJrekin lortutako itunei esker.

EH Bildu, BNG eta ERCko ordezkariak Madrilgo Kongresuan. (EH BILDU)
EH Bildu, BNG eta ERCko ordezkariak Madrilgo Kongresuan. (EH BILDU)

Espainiako Kongresuak ostegun honetan onartu du 2022rako Estatuko Aurrekontu Orokorren Lege Proiektua, 188 botoko gehiengo zabalarekin, eta, beraz, 2021eko kontuek bermatutako laguntza berberak izan ditu.

Aurreikusita zegoen bezala, bozketak duela urtebete gertatutakoa errepikatu du, PSOE, Unidas Podemos, ERC, EAJ, EH Bildu, PDeCat, Más País, Compromis, PRC, Nueva Canarias eta Teruel Existeren aldeko 188 botorekin. Aurreko aurrekontuen bozketari dagokionez, aldaketa bakarra izan da BNG aurkako bototik abstentziora igaro dela.

Kontrako botoa eman dute 157 diputatuk, besteak beste, PP, Vox eta Ciudadanosekoak, eta 2 abstentzio izan dira.

Aurrekontuz kanpoko bi kontuk desblokeatu dituzte kontuak Kongresuan. Hala, azken orduan, osotasunari egindako zuzenketarekin, ERCk eta EAJk akordio bat iragarri dute PSOErekin, lehenengo bozketan kontuak abalatzeko: lehenak ikus-entzunezkoen Lege berrian hizkuntza koofizialetan egindako produkzioei kuota bat bermatzeko, eta bigarrenak EAEra gutxieneko diru sarrera transferitzeko.

Katalanez, euskaraz eta galiziarrez produkzioak

Ostegun honetako batzarraldia hasi aurretik, ERC, EH Bildu eta BNGk akordio bat lortu dute ostegun honetan Espainiako Gobernuarekin katalanez, euskaraz eta galiziarrez egiten diren ikus-entzunezko produkzioen aldeko funts bat sortzeko. Zehazki, talde subiranistak, 10,5 milioi euroko funtsa adostu dute aipatutako produkzioak aurrera eramateko.

Ohar batean azaldu dutenez, Kongresuan onartu egin den zuzenketaren arabera, hitzarmenak sinatuko dira Espainiako eta bi hizkuntz ofizialak dituzten erkidegoetako gobernuen artean ikus-entzunezko produkzioak finantzatzea helburua duten diru laguntzak arautzeko.

Helburua da, adierazi duten bezala, aipatutako ikus-entzunezko produkzioak sustatzea, haien hedapena erraztuz. Hala, euskal zinema bultzada bat jasoko du onartu berri den zuzenketari esker.

Bestalde, Unidas Podemosek iragarri du ikus-entzunezko Lege berriaren azken testuak, hizkuntza koofizialez gain, berezko hizkuntzatzat legezko onarpena duten hizkuntzak kontuan hartzea defendatzen jarraituko duela, hala nola asturiarra eta aragoiera.

Europa Press-i egindako adierazpenetan, Unidas Podemoseko bozeramailea Sofía Castañón asturiarrak azaldu duenez, oraingoz lortu dena «zenbait indar politikoren artean» berariazko akordioa da.

Ildo horretatik, azaldu du legearen azken testuak hizkuntza ofizialak eta berezko hizkuntzatzat legezko onarpena dutenak kontuan hartzea defendatzen jarraituko dutela. Alegia, asturiarra eta aragoiera. Bi hizkuntz ahauek ez dira ofizialak, baina autonomia-estatutuek eta zenbait legek aitortzen eta babesten dituzte.

PPk indargabetu zuen 2012an

Gogoratu duten arabera, 2009 eta 2011 urteen bitartean funts bat existitzen zen katalanez, euskaraz eta galiziarrez egiten ziren produkzioen alde, Kultura Ministerioaren bitartez kudeatzen zena. Baina 2012an Mariano Rajoyren Gobernuak indargabetu zuen.

2007an onartutako Zinemaren Legeak jasotzen du ere halako funts baten beharra, ofizialak diren hizkuntz gutxituen erabilera sustatzeko. ERC, EH Bildu eta BNGk proposatutako ekimenari esker, funts hori martxan jarriko da, 10,5 milioi euroko aurrekontuarekin.

Aurretik beste akordio ugari lortu dituzte ERCk eta EH Bilduk bereziki, eta beren baiezko bozarekin aurrera aterako da proiektua Kongresuan.