NAIZ

Katalina Erauso kalearen izena Antonio Erauso izan dadila eskatu du Elkarrekin Donostiak

Katalina Erauso kalearen izena berrikustea proposatu du Elkarrekin Donostiak, Antonio Erauso izatera pasatzeko. Izan ere, «Alferez Moja» zenak gizonezko izen hori erabiltzea erabaki zuela gogoratu du Aitzole Araneta zinegotziak.

Katalina Erausok Antonio izena ere erabili zuen.
Katalina Erausok Antonio izena ere erabili zuen. (WIKIPEDIA)

Elkarrekin Donostia udal taldeak Katalina Erauso kalearen izena berrikusteko proposamena egin du, XVI. mendeko «Alferez Moja» ezizenez ezagutzen zenak bere burua Antonio bezala deitzea eskatu zuela gogoratuz.

Donostian jaiotako Katalina Erausok gizonez jantzi, Armada espainolarekin bat egin eta Ameriketako kolonizazioan parte hartu zuen, maputxeen aurka arituz eta alferez mailara iritsiz.

Aitzole Araneta zinegotziak azaldu duenez, «dokumentu historiko asko daude bere bizitzan zehar izen maskulino ezberdinak izan zituela adierazten dutenak. Azkena Antonio izan zen. Izen horrekin, administratiboki eta instituzionalki, Aita Santua, Erregea edo garaiko sistema judiziala bezalako estamentuen bidez aitortua izan zen». 

Aranetaren arabera, «kontua ez da orain Katalina Erausok bere burua nola autodefinitzen zuen, gizon edo emakume gisa, eztabaidatzea».

Baina zera azpimarratu du: «Gure hirian kale bat izendatzeko bezain pertsonaia garrantzitsua baldin bada, 20 urte baino gehiagoz eta bere egunen amaierara arte eramatea aukeratu zuen izenak isla izan beharko luke».

Bide batez, Donostiako kale izenen ponentzia urtebete bildu gabe egon dela salatu du Aranetak, bere maiztasuna hilean behinekoa izatea onartu bazen ere.

«Donostiak izen maskulinoak dituzten kale gehiago ditu femeninoak baino. Hori zuzendu egin behar da parekidetasuna lortzeko. Hala ere, gure ustez gure hirian izan den aniztasuna ere irudikatu beharko luke kale izendegiak berdintasun printzipioa bete dezan, hori ere ikusezina izan baita historian zehar», ondorioztatu du Aranetak.