NAIZ.INFO
DONOSTIA

EPPKren «erantzukizun politikoa» eta «urrats sendoa» nabarmendu ditu LABek

LABen ustez, Euskal Preso Politikoen Kolektiboak (EPPK) gatazka politikoaren ondorioak gainditzeko bidean aurrera egiteko urratsa egin du bere azken adierazpenarekin, eta «urrats sendoa eta eraginkorra» presoen auzia konpontzeko. Euskal sindikatuekin harremanetan jarriko da adierazpenarekin sortutako egoera berria aztertzeko.

LABen Komite Exekutiboak oharra kaleratu du EPPKren azken adierazpenaren balorazioa egiteko. Sindikatu abertzalearen iritziz, Euskal Preso Politikoen Kolektiboak «erantzukizun politikoa» erakutsi du eta urratsa egin du gatazka politikoaren ondorioak gainditzeko bidean aurrera egin ahal izateko. «Urrats sendoa eta eraginkorra» presoen auzia konpontzeko, azpimarratu du.

Nabarmendu duenez, euskal eragile politiko, sozial eta sindikalek beren konpromisoak «indartu behar dituzte euskal preso politikoak Euskal Herriratzeko eta etxeratzeko bidean urrats gehiago eman ahal izateko». Ildo horretan, iragarri du euskal sindikatuekin harremanetan jarriko dela, EPPKren adierazpenarekin «sortutako egoera berria aztertzeko eta irekitako bidean lagundu dezaketen iniziatiba sindikalak baloratzeko».

Horretaz gain, dei egin die langileei EPPkren adierazpena lantokietan zabal dezaten eta presoak eta iheslariak Euskal Herriratzeko eskakizuna mobilizazioen bidez indartzen jarrai dezaten.

EPPKren «erantzukizun politikoa» txalotzearekin batera, LABek «egoera historiko hau kudeatu behar duten gobernuei falta zaien maila politikoa» salatu du. «Honetan ere eskutik hartuak doaz Madrilgo eta Gasteizko gobernuak, konponbideak eraikitzeko inolako asmo, borondate eta ausardiarik gabe», adierazi du.