Radio Euskadiri eskainitako elkarrizketa batean, Iruñeko Gobernuko eledunak «terrorismoaren aurka» egiten diren polizia operazioak onetsi ditu, «Estatu demokratiko batean lekurik ez duelako».
«Frogatu da terrorismoa herritar guztien askatasunaren etsai nagusia dela», Sanchez Muniainek esan duenez.
Barne Ministerio espainolak atzoko operazioaren berri eman ote dion galdetuta, ezezkoa adierazi du. «Kasu honetan, beste edozein herritarrek izan duen ezagutza eduki du (Gobernu nafarrak)».
Era berean, operazioa Estatuko Segurtasun Indarrena izan dela esan du eta Nafarroako Gobernuak «komunikabideen bitartez jaso ahal izan duen informazioa» daukala gaineratu.