Arantxa MANTEROLA
Baiona

EH Bairen emaitzak, abertzaleak irabazten ari diren sinesgarritasunaren lekuko

Biziki positibotzat jo dituzte emaitzak, bai lehen itzulian lortutakoak zein bigarren itzulikoak ere bai. Beren mezu eta aldarrikapenek «sinesgarritasuna» irabazten ari direla nabarmendu dute.

EH Baiko ordezkariek Baionan eskeinitako prentsaurrekoan. (Bon EDME)
EH Baiko ordezkariek Baionan eskeinitako prentsaurrekoan. (Bon EDME)

«Arrakasta horrek erakutsi du jendeak gure aldarriei garrantzia ematen diotela, batez ere, egitura instituzional propioa izatearenari» esan du Anita Lopepek gaur goizean Baionan egindako agerraldian.

EH Baiko beste lau kide zituen alboan, Joana Urbistondo, Leonie Agergaray, Peio Etxeberri-Aintziart eta Alain Iriart (azken hori Errobi-Aturri kantonamenduan kontseilari hautatu dutena), bigarren itzulian aurkeztu diren bost kantonamenduetako hautagaiak, hain zuzen. Ipar Euskal Herriko bazter guztietan EH Bairen ordezkariak present izateak «bai landalur eremutan zein hiri eremuan ere hedatzen ari garela frogatzen du» adierazi dute.

Aurrerantzean, ‘Euskal Herrian bizi, lan egin eta erabaki’ kanpainako leman oinarri hartuta, Paueko Kontseiluan ere, alor guztietako lana egingo dutela ziurtatu dute, hiru lurraldeetako erakundetzeari lehentasuna emanez.

Bihar aukeratuko da Departamenduko Kontseiluko presidentea eta Alain Iriartek bere hautagaitza aurkeztuko du bertan, batez ere, EH Bairen mezua entzunarazteko.