Elezkano-Rezustak erabakita utzi dituzte finalerdiak (22-9)

Laso-Albisuk ez dute euren azken aukera baliatu eta Olaizola II-Imaz, Altuna III-Martija eta Ezkurdia-Zabaleta finalerdietan dira

Jon Ormazabal|2018/02/12 19:00

Aspaldiko txapelketarik orekatuena behar zuenak inoiz baino lehenago ezagutu ditu finalerdietan arituko diren lau bikoteen izenak Elezkano II.a-Rezustak Tolosan lortutako garaipenarekin. Liderrekin batera, Olaizola II-Imaz, Altuna III-Martija eta Ezkurdia-Zabaleta dira sailkatutako bikoteak, beraz, hiru Aspeko eta Asegarceko bakarra.

Tolosako ihauterietako lehen jaialdiak ez dio sortutako ikusminari erantzun eta oreka gutxikoa izan da. Aspalditik sailkatuta izan arren, Elezkano eta Rezustak betiko bidetik jarraitu dute, oso serio jokatu eta ez diete inolako aukerarik eman behar larrian ziren Laso-Albisuri.

Bergarako atzelariak beste erakustaldi bat eman du, pilotakada latzak jo ditu eta apenas galdu du alerik. Bere itzalean, Danel Elezkanok ere izugarrizko konfiantza hartu du bere buruarengan eta ausart jokatuz, partida borobila osatu du.

Asegarcekoek, aldiz, jokoan asko zutelako akaso, ez dira euren mailan aritu, akats asko bildu dituzte, eta ez dute esperotakoa eman, euren enpresaren txapelketa txarra konfirmatuz.