Basque Culinary Centerrek  BCC Innovation, munduko lehen gastronomia zentro teknologikoa, irekiko du. Ohar baten bideaz azaldu dutenez, zentroa abiarazteak «ikerkuntzaren eta berrikuntzaren alde egindako apustua» erakusten du, «mundu mailako erreferente» bilakatu nahian.

Zentroa aitzindari izanen da bi garapen-polo integratzeagatik: Mondragon Unibertsitateari atxikitako Gastronomia Zientzien Fakultatea eta BCC, Gastronomia Zentro Teknologikoa. «Zentroak gastronomiaren XXI. mendeko erronkei erantzungo die osasunaren, kalitatearen, jasangarritasunaren eta ekonomiaren alorretan», azaldu dutenez.

Haien hitzetan, «BCC Innovationek ezagutza sorraraziko du gastronomiaren sektorearen inguruan» eta zenbait helburu beteko ditu. Besteak beste, «ezagutza aberastasun bilakatzea, enpresetan berrikuntza sustatzea eta enpresa berrien sorrerari babes aktiboa ematea, sektorearen etorkizuna bermatzeko».

Bide horretan, 25 pertsonako lan-talde batek osatuko du BCC Innovation, hala nola hainbat diziplinatako ikertzaileek, teknikariek eta kudeatzaileek. 2017. urtean, Basque Culinary Centerreko I + G zentroa 40 enpresa eta erakunderekin baino gehiagorekin jardun zen elkarlanean.

«Gastronomia oso azkar ari da aldatzen: chefek sukaldaritzako teknika berriak garatu dituzte, beren egunerokoan erabiltzen dituzten teknologia eta ekipamenduen garapenari lagundu diote, sektorea eraldatzen ari diren esperientzia berritzaileak asmatu dituzte eta, laburbilduz, sektorearen diziplina arteko potentziala agerian jarri dute», nabarmendu dute.

Eta eraldaketa horretan, «hainbat erronka berriri» erantzun behar diela adierazi dute. Kalitatearen, osasunaren, jasangarritasunaren eta ekonomiaren alorretan, adibidez.