Ostegun honetan egin den osoko bilkuran, EH Bildu, Geroa Bai, Aranzadi eta Izquierda-Ezkerraren aldeko botoekin aurrera atera da Iruñeko euskararen ordenantza berria.
UPNk eta PSNk aurka bozkatu dute eta, hortaz, Udalaren eremuan euskararen erabilera eta sustapena arautzen duen ordenantza aldeko 14 boto eta aurkako 13rekin onartu da.
Osoko bilkuran, UPNk iragarri du ordenantza auzitegietara eramateko intentzioa duela.
Aritz Romeo zinegotzi abertzaleak leporatu die haien «helburu bakarra» euskara «ikusezin» bihurtzea dela eta aldarrikatu du «gure aberastasun eta ondare kulturala» dela hizkuntza.
Ordenantza berriak euskara eta gaztelera Iruñeko «berezko hizkuntza» gisa hartzen ditu eta, hortaz, zerbitzuak jasotzeko zein administrazioarekin harremanak izateko euskal hiztunek duten eskubidea garatzen du.
Euskara sustatu eta hedatu beharreko ondasuna dela ere jasotzen du.
Behin ordenantza onartuta, pozik agertu da Joseba Asiron alkatea. Twitter sare sozialean argitaratu duen mezu batean azpimarratu du «normalizaziorantz» urrats berri bat eman duela Udalak ordenantza onartuta.
Iruñean euskararen normalizaziorantz urrats berria eman dugu: euskararen ordenantza berria.
— Joseba Asiron Saez (@josebaasiron) 7 de febrero de 2019
Araudi honek euskara Iruñeko hizkuntza propio gisa aitortzen du, eta administrazioan euskara zerbitzu hizkuntza dela bermatuko du.#HizkuntzEskubideak #euskarazbizitzeragoaz