Naiz

Steve Maiaren heriotza salatzeko elkarretaratzea egin dute Baionan

Steve Maia Caniço gaztearen gorpua astelehenean atzeman zuten, Loira ibaian. Bestaren Musika kari Nantes (Bretainia) hirian eginiko kontzertuaren biharamunean Polizia kaian bildutako gazteen kontra oldartu ondoren hainbat lagun uretara erori ziren, horien artean Steve. Hilabete bat bere bila igaro ondoren, hilotz atzeman zuten gaztea.

Askatasun plazan bildutako lagunek polizi indarkeria salatu dute. Bob EDME
Askatasun plazan bildutako lagunek polizi indarkeria salatu dute. Bob EDME

Txaleko Horiak, Frantzia Insumitua eta Ipar Euskal Herriko Antifaxista sarea izan dira gaur 20.00tan Baionako Herriko Etxearen aurrean eginiko elkarretaratzearen bultzatzaileak.

Steve Maia Caniço (24 urte) oroimenean eginiko ekimen honen bidez gaztearen heriotza argitzeko galdegin dute. Oroitarazi behar da 24 urteko gaztearen gorpua atzeman ondoren, bere heriotzak loturarik ez zuela frantses Poliziak ekainaren 22an Nantes hirian eginiko kargarekin adierazi zuela Castaner Barne ministroak.

Hala ere, nahigabeko heriotza izan zelakoan ikerketa zabaldu du frantses Justiziak.

Steve Maia Caniço hezitzaile zen eta beste hainbat lagunekin batera Musikaren Besta kari antolaturiko kontzertu batetara joan zen. Biharamunean, goizaldeko 4ak aldera, gazteak soinu ekipoa biltzeko lanetan zirelarik polizia azaldu zen.

Steveren lagunek azaldu zutenez - "Liberation" egunkariak zabalduriko bideoek bat etortzen dira bertsio horrekin- poliziek ke poteak ea bestelako armak baliatu zituzten. Horren ondorioz 14 bat lagun uretara erori ziren, haien artean azkenik hilotz atzeman zuten gaztea.

Steve Maiaren kasua polizi bortizkeriaren sinbolo berria bilakatu da eta Bretainian zein beste hainbat eskualde eta hirietan, Baionan kasu, bere aldeko elkartasun ekimenak burutu dituzte.