NAIZ

%97ko okupazio tasa dute Mondragon Unibertsitatean duela lau urte titulatutakoek

Mondragon Unibertsitateko 2015eko promozioko ikasleen %3 bakarrik dago langabezian. %90ek lan egiten du eta gainerako %7ak prestakuntza jasotzen jarraitzen du. Lanbideren azken txosteneko datuak dira.

Beatriz Artolazabal sailburua eta Vicente Atxa errektorea, Lanbideren datuak aurkezten.
Beatriz Artolazabal sailburua eta Vicente Atxa errektorea, Lanbideren datuak aurkezten.

Mondragon Unibertsitateko tituludun gazteen okupazio-tasa %97koa da 2015eko promozioari dagokionez. Gazteen %88k bere unibertsitate-prestakuntzarekin bat datorren enplegua du.

Promozio horretako kideen %3 bakarrik dago langabezian. %90ek lan egiten du, eta gainerako %7k prestakuntza jasotzen jarraitzen du. Lakuaren Euskal Enplegu Zerbitzuak (Lanbide) 2015ean Mondragon Unibertsitatearen sustapenari buruz egindako azken laneratze-inkestaren datuak dira. Asteazken honetan aurkeztu dituzte, Hernaniko Orona Fundazioan, Beatriz Artolazabal sailburuak eta Vicente Atxa errektoreak.

Artolazabal Enplegu eta Gizarte politiketako sailburuak nabarmendu duenez, «Mondragon Unibertsitateak merkatuaren beharretara egokitzeko duen gaitasuna erakusten dute inkesta horretako datuek. Bost urte eskasean, %22,7tik %3,4ra igaro da langabezia».

Azkenaldiko emaitzarik onenak

Aurkezpenean agertu dutenez, txostenaren emaitzek oso emaitza onak erakusten dituzte unibertsitatearen enplegagarritasun-tasari eta oinarrizko beste adierazle batzuei dagokienez, bai lehen enpleguaren bilaketan, bai haren garapenean.

Atxa errektoreak azaldu duenez, «azken urteetako emaitzarik onenak dira, eta enplegu-tasa oso altua erakusten dute». 2015eko promozioko hamar ikasletik bederatzik lan egiten dute. Enplegu tasa handiagoa da emakumeen artean: %93,5 inguru, eta haien langabezia tasa %1,2ekoa da.