Nagore BELASTEGI
durango

Espetxean sortzea zer den irudikatu du Ataramiñe argitaletxeak

Hainbat sortzailek aukeratutako olerkiak irakurri dituzte Ataramiñe argitaletxeak antolatutako irakurraldi publiko batean. Landako gunetik kalera atera dute euren jarduna presoen bozgorailu izan nahian.

Poema baten irakurketa ziega baten parean. (NAIZ)
Poema baten irakurketa ziega baten parean. (NAIZ)

Ataramiñe argitaletxeak Landakotik atera du bere jarduna. Plateruena antzokiaren kanpoan ziega bat muntatu du, normalean jendeak preso egotea zer den jakin dezan erabiltzen dutena. Kasu honetan espetxe espainol batetako ziega baten dimentsioak dituen eraikuntza ekarri dute durangora, eta horren aurrean olerkiak irakurri dituzte ordu betez.

‘Espetxearen hotsak, barrote artetik poesia irakurraldia’ izena jarri dioten ekimenean sortzeak preso batentzat zer suposatzen duen islatu nahi izan dute, askotan «sortzea bizirauteko estrategia dat delako». Irakurketaren une batzuetan musikaz lagundu dira esatariak; musikariek saxoarekin edo gitarrarekin giro ederra sortu dute.

«Aurten espetxean sortzea zer den irudikatuko dugu. Azokatik pasatzen diren sortzaile desberdinak eta herritarrek aukeratzen dituzten olerkiak irakurriko dituzte», kontatu digu Oier Gonzalez Ataramiñeko arduradunetako batek. Mikrofono aurretik pasatu diren batzuk poetak dira, adibidez, Jose Luis Otamendi, Mikel Antza, Fito Rodriguez, Karmelo Landa eta Peru Madalena.

Ataramiñe 2001an sortu zen lagun talde baten ekimenez euskal preso politikoen sorkuntza lanak argitaratzeko helburuarekin. Orduztik kartzelan dauden horien ahotsa kalera ateratzen dute, bozgorailu bat izango balitz bezala.