Iruñerria Jamaica Clash kolektiboaren hirugarren urteurren festa antolatu dute

Txantrea auzoko Akelarre Kultur Elkartean ‘Iruñerria meets Jamaica’ festaren laugarren edizioa ospatuko dute larunbatean. Bertan azoka bat ere antolatuko dute eta prezio herrikoiak izango dituen afaria ere eskainiko dute. Aurten, dantzalekura mozorrotuta joateko deialdia egin dute.

NAIZ|Iruñea|2020/01/03
Jamaica-clash
Akelarre Kultur Elkartea bete egiten da festa antolatzen dutenean. (NAIZ)

‘Iruñerria meets Jamaica #4’ izena daraman festa ospatuko dute larunbatean Txantreako Akelarre Kultur Elkartean, Iruñerria Jamaica Clash kolektiboaren hirugarren urteurrena ospatzeko asmoz. Ospakizuna 18.00etan hasiko da.

2016an jaio geroztik, Iruñerria Jamaica Clash lanean dabil Iruñeara kultura eta musika jamaikarra ekartzeko asmoarekin. Hiru urte hauetan 20 hitzordu baino gehiago antolatu dituzte, halanola, festak, hitzaldiak eta proiekzioak.

Festaren laugarren edizio honetan aukera izango da inguruko zein kanpotik etorritako hainbat artista ezagutzeko, guztiak doinu jamaikarrak lantzen dituztenak. Oraingoan izango dira Iruñean Apatxe Sound, Ostruka Selektah, Chill Mafia Records, Nani & Peach, Arga Music Showcase, Bassagain, Bigg TM, Reimy, Erreugiñak eta Iruñerria Jamaica Clash kolektiboa bera.

Bestalde, festak azoka bat izango du eszena lokalaren inguruko CD, binilo, fanzine eta bestelako materiala saltzeko. Era berean, afaria eskainiko dute prezio herrikoiean, eta berritasun bezala, jendeari mozorrotuta bertaratzeko deia egin diete.

Amaitzeko, antolatzaileek argi utzi nahi izan dute ospakizunean ez dutela inolako erasorik onartuko.